ဦးထွန်းရွှေ (ခရမ်းခြံရွာ) တန့်ဆည်မြို့နယ်၊ စစ်ကိုင်းတိုင်းရဲ့ လျှောက်ထားသော မေးခွန်းများမှာ-
ငါးရာ့နှစ်ဆယ်၊ ရှစ်သွယ်မေတ္တာ၊ ကျမ်းအလာ၊ သေချာ ပြတော်မူ။
အမေး။ ။(ဂ)ဆရာတော်ဘုရား ၅၂၈-သွယ်မေတ္တာကိုတော့ ဆရာတော်ဘုရား သင်ပြမှုကြောင့် သိရပါပြီဘုရား။
(အများပြည်သူ ဖတ်ရှုနိုင်ရန် ထို ၅၂၈-သွယ်မေတ္တာကို ထပ်မံရှင်းပြပေးပါဘုရား ။)
အဖြေ။ ။(ဂ) ၅၂၈-သွယ်မေတ္တာ ရေတွက်ပုံမှာ---
ပဌမဦးစွာ မေတ္တာပွါးနည်း ၄-မျိုးကို မှတ်ထားရမယ်---
၁။ ဘေးရန် ကင်းကြပါစေ (အဝေရာ ဟောန္တု)၊
၂။ စိတ်ဆင်းရဲခြင်း ကင်းကြပါစေ (အဗျာပဇ္ဈာ= အဗျာပဇ္ဇာ ဟောန္တု)၊
၃။ ကိုယ်ဆင်းရဲခြင်း ကင်းကြပါစေ (အနီဃာ ဟောန္တု)၊
၎။ (ကိုယ်စိတ်နှစ်ဖြာ) ချမ်းသာစွာဖြင့် မိမိတို့ခန္ဓွာဝန်ကို ရွက်ဆောင်နိုင်ကြပါစေ (သုခီ အတ္တာနံ ပရိဟရန္တု)။
ဒုတိယဆင့်အနေနဲ့ ပုဂ္ဂိုလ် ၁၂-မျိုးမှတ်ပါ---
၁။ အလုံးစုံသော သတ္တဝါတွေ= သတ္တဝါအားလုံး (သဗ္ဗေ သတ္တာ)၊
၂။ အလုံးစုံသော ထွက်သက်ဝင်သက်ရှိသူတွေ (သဗ္ဗေ ပါဏာ)၊
၃။ အလုံးစုံသော ထင်ရှားဖြစ်သူတွေ (သဗ္ဗေ ဘူတာ)၊
၎။ အလုံးစုံသော ပုဂ္ဂိုလ်တွေ (သဗ္ဗေ ပုဂ္ဂလာ)၊
၅။ အလုံးစုံသော ခန္ဓာကိုယ် အတ္တဘောရှိသူတွေ (သဗ္ဗေ အတ္တဘာဝပရိယာပန္နာ)
ဤ ပုဂ္ဂိုလ် ၅-မျိုးသည် အပိုင်းအခြားမရှိသောအားဖြင့် ဖြန့်မေတ္တာပွါးအပ်ရာ ဖြစ်သောကြောင့် အနောဓိသပုဂ္ဂိုလ် ၅-ယောက်-ဖြစ်တယ်။
၆။ အလုံးစုံသော မိန်းမတွေ (သဗ္ဗာ ဣတ္ထိယော)၊
၇။ အလုံးစုံသော ယောက်ျားတွေ (သဗ္ဗေ ပုရိသာ)၊
၈။ အလုံးစုံသော အရိယာတွေ (သဗ္ဗေ အရိယာ)၊
၉။ အလုံးစုံသော ပုထုဇဉ်တွေ (သဗ္ဗေ အနရိယာ)၊
၁ဝ။ အလုံးစုံသော နတ်တွေ (သဗ္ဗေ ဒေဝါ)၊
၁၁။ အလုံးစုံသော လူတွေ (သဗ္ဗေ မနုဿာ)၊
၁၂။ အလုံးစုံသော အပါယ်ဘုံသားတွေ (သဗ္ဗေ ဝိနိပါတိကာ)။
ဤပုဂ္ဂိုလ် ၇-မျိုးကား မိန်းမ ယောက်ျား စသည်ဖြင့် အပိုင်းအခြားအားဖြင့် ဖြန့်မေတ္တာပွါးအပ်ရာ ဖြစ်သောကြောင့် သြဓိသပုဂ္ဂိုလ် ၇-ယောက်-ဖြစ်တယ်။
တတိယဆင့်အနေနဲ့---
ဤပုဂ္ဂိုလ် ၁၂-မျိုးတွင် ၁-မျိုး ၁-မျိုး၌ မေတ္တာပွါးနည်း ၄-နည်းဖြင့် ပွါးနိုင်သောကြောင့် ပုဂ္ဂိုလ် ၁၂-မျိုးကိုတည် မေတ္တာပွါးနည်း ၄-နည်းဖြင့် မြှောက်လျှင် (၁၂x၄=၄၈) ၄၈-နည်းရတယ်၊ အရပ်မျက်နှာမပါဘဲ မေတ္တာပွါးလျှင် ၄၈-ဖြစ်တယ်။
ဥပမာ---
အလုံးစုံသော သတ္တဝါတွေ ဘေးရန်းကင်းကြပါစေ (သဗ္ဗေ သတ္တာ အဝေရာ ဟောန္တု)၊
စိတ်ဆင်းရဲခြင်း ကင်းကြပါစေ (အဗျာပဇ္ဈာ=အဗျာပဇ္ဇာ ဟောန္တု)၊
ကိုယ်ဆင်းရဲခြင်းကင်းကြပါစေ (အနီဃာ ဟောန္တု)၊
(ကိုယ်စိတ်နှစ်ဖြာ) ချမ်းသာစွာဖြင့် မိမိတို့ခန္ဓွာဝန်ကို ရွက်ဆောင်နိုင်ကြပါစေ (သုခီ အတ္တာနံ ပရိဟရန္တု)။
စတုတ္ထဆင့်အနေနဲ့ အရပ် ၁ဝ-မျက်နှာကို မှတ်ပါ---
၁။ အရှေ့အရပ်၌ (အရှေ့အရပ်မှာ) (ပုရတ္ထိမာယ ဒိသာယ)၊
၂။ အနောက်အရပ်၌ (ပစ္ဆိမာယ ဒိသာယ)၊
၃။ မြောက်အရပ်၌ (ဥတ္တရာယ ဒိသာယ)၊
၎။ တောင်အရပ်၌ (ဒက္ခိဏာယ ဒိသာယ)၊
၅။ အရှေ့မြောက်အရပ်၌ (ပုရတ္ထိမာယ အနုဒိသာယ)၊
၆။ အနောက်တောင်အရပ်၌ (ပစ္ဆိမာယ အနုဒိသာယ)၊
၇။ အနောက်မြောက်အရပ်၌ (ဥတ္တရာယ အနုဒိသာယ)၊
၈။ အရှေ့တောင်အရပ်၌ (ဒက္ခိဏာယ အနုဒိသာယ)၊
၉။ အောက်အရပ်၌ (ဟေဋ္ဌိမာယ ဒိသာယ)၊
၁ဝ။ အထက်အရပ်၌ (ဥပရိမာယ ဒိသာယ)။
ဤအရပ် ၁ဝ-မျက်နှာတွင် အရပ်မျက်နှာ ၁-ခု ၁-ခု၌ ၄၈-မျိုး မေတ္တာပွါးနိုင်သောကြောင့် အရပ် ၁ဝ-မျက်နှာကိုတည် မေတ္တာပွါးပုံ ၄၈-ဖြင့် မြှောက်လျှင် ၄၈ဝ (၁ဝx၄၈=၄၈ဝ) ဖြစ်တယ်၊ အရပ် ၁ဝ-မျက်နှာ, ပုဂ္ဂိုလ် ၁၂-မျိုး, မေတ္တာပွါးနည်း ၄-နည်းတို့ တွဲစပ်ပွါးလျှင် အရပ်ညွှန်း မေတ္တာ ၄၈ဝ-ရသည်ဟု ဆိုလိုတယ်။
ပဌမဆင့်အနေနဲ့ အရပ်မျက်နှာ ညွှန်းမှုမပါ မေတ္တာပွါးနည်း ၄၈-နှင့် အရပ်မျက်နှာညွှန်းမှုပါသော မေတ္တာပွါးနည်း ၄၈ဝ-ကို ပေါင်းပါက (၄၈+၄၈ဝ=၅၂၈) ငါးရာ့နှစ်ဆယ် ရှစ်သွယ်မေတ္တာ ဖြစ်တော့၏။
၅၂၈-သွယ်မေတ္တာလင်္ကာ
ငါးရာ့နှစ်ဆယ်၊ ရှစ်သွယ်မေတ္တာ၊ ယူနည်းမှာမူ၊ ကျမ်းလာသို့ မှတ်လေ။ အနောဓိသ၊ ပုဂ္ဂလသည်၊ ပဌငါးယောက် နေရှင့်။ ထူးတထွေရည်မှတ်သား၊ သြဓိသမှာ၊ ပုဂ္ဂလာသည်၊ မှန်စွာ ခုနစ်ပါးတည်း။ ပေါင်းညားက ယွင်းမသွေ၊ ပုဂ္ဂိုလ် အပြား၊ ဆဲ့နှစ်ပါးကို၊ မမှားရဘို့လေသော်။ အဝေရာ, ဗျာပဇ္ဇ, အနီဃ,ဟု၊ သုခီအတ္တာ, လေးဖြာမြှောက်လစ်၊ လေးဆဲ့ရှစ်သည်၊ စင်စစ်ရလေပါလိမ့်။ ဋ္ဌကထာအလိုမူ၊ ပိယ, သဟာ,၊ မဇ္ဈာ, ဝေရီ,၊ လေးလီမြှောက်လေဟူ၏။ ရပ်ဆယ်ဆူ မြှောက်ပြန်လျှင်၊ လေးရာ့ရှစ်ဆယ်၊ အကယ်ရသည်ပင်တည်း။ ယင်းသည်တွင် ရပ်ဒေသ၊ မရည်မှတ်လစ်၊ လေးဆဲ့ရှစ်ကို၊ တလစ်နှောလိုက်ကလျှင်။ မှန်မုချမယွင်းပါ၊ ငါးရာနှစ်ဆယ်၊ ရှစ်သွယ်မေတ္တာ၊ ပြည့်သည်သာဟု၊ သိပြီးခါပွါးစေက၊ အိပ်နိုး ချမ်းသာ, ယုတ်မာမမက်, နှစ်သက်နတ်လူ, ဒေဝါကူမ, ဆိပ်မူမနှံ့, စိတ်မပျံ့တည်ကြည်, လှသည်မျက်နှာ, သေခါမတွေ, ဖြစ်လေဗြဟ္မာ, ဆဲ့တခါစင်၊ အာနိသင်ကို၊ လျင်လျင်အမြဲရ၏။ ဧကန္တမှတ်ဘို့ပါ၊ ယုံမှားမဲ့အောင်၊ ကျမ်းစောင်စောင်မှ၊ ဆောင်၍ မိန့်လိုက်မှာသည် သည့်တိုင်းသာမှတ်က ကဝိရောင်ပြေး။
(မာတိကာဓာတုကထာအရကောက်နှင့် အဓိပ္ပါယ်, ဂဏ္ဌအချိုး အမျိုးမျိုး နှာ ၆၂၄-မှ။)
ဆရာတော် ဦးဇောတာလင်္ကာရ
ဓမ္မာနန္ဒ ဝိဟာရ
ဟာ့ဖ်မွန်းဗေးမြို့
No comments:
Post a Comment