ဒေါ်ကျင်မွှေး (Daly City) လျှောက်ထားသော မေးခွန်းမှာ---
တဏှာသုံးသွယ်၊ နက်ဓိပ္ပါယ်၊ သိဖွယ်လင်းတော်မူ။
မေး။ ။(ဈ) တဏှာ ၃-မျိုး= ကာမတဏှာ, ဘဝတဏှာ, ဝိဘဝတဏှာ-တို့ကို ရှင်းပြပေးပါဘုရား။
ဖြေ။ ။(ဈ) တဏှာ ၃-မျိုးတွင်---
(၁) ကာမတဏှာ- ငါးဖြာအာရုံ ကာမဂုဏ်၌ တွယ်တာနှစ်သက်မှု၊
(၂)ဘဝတဏှာ- ဘဝကို တောင့်တနှစ်သက်မှု
(ဘဝကို တောင့်တသည်၏အစွမ်းဖြင့် မပြတ်မစဲ အမြဲဖြစ်၏ဟု ယူသော သဿတဒိဋ္ဌိနှင့် တကွဖြစ်သောတဏှာ)၊
(၃) ဝိဘဝတဏှာ- သေလျှင် ပြတ်၏ဟု ယူသော ဥစ္ဆေဒဒိဋ္ဌိနှင့်တကွဖြစ်သော တဏှာ။
အနည်းငယ်ချဲ့လျှင်---
“ရုပ်အဆင်းစသော အာရုံတွေကို တွယ်တာသာယာသည့်အခါတွင် ၄င်းတွယ်တာသာယာမှု တဏှာကို ‘ကာမတဏှာ’ဟု ခေါ်တယ်၊
ရုပ်အဆင်းစသော အာရုံတို့၌ အတ္တရှိသည်၊ ထိုအတ္တရှိသော အာရုံတို့သည် အမြဲတည်သည်- ဟူသော အယူနှင့် ယှဉ်တွဲဖြစ်သော တဏှာကို ‘ဘဝတဏှာ’ဟု ခေါ်ရပြန်တယ်၊
ရုပ်အဆင်းစသော အာရုံတို့မှာ အတ္တရှိသည်၊ ထိုအတ္တရှိသော အာရုံတို့သည် ဤဘဝပြီးလျှင် ပြတ်စဲ, ပျက်စီးသွားတော့သည်၊ နောက်ထပ် ဘာမှ မဖြစ်တော့-ဟူသော အယူနှင့်ယှဉ်တွဲဖြစ်သောတဏှာကို ‘ဝိဘဝတဏှာ’ဟု ခေါ်ရပြန်တယ်။ ဤကဲ့သို့ တဏှာ ၃-မျိုးကို မှတ်ပါ။
ဆရာတော် ဦးဇောတာလင်္ကာရ
ဓမ္မာနန္ဒ ဝိဟာရ
ဟာ့ဖ်မွန်းဗေးမြို့
No comments:
Post a Comment