မောင်အောင်သက်မွန် (ရန်ကုန်) လျှောက်ထားသော မေးခွန်းမှာ---
မေး။ ။ အရှင်ဘုရား
စိတ်သာရှင်စော၊ ဘုရားဟော၊ ဆိုပြောရှိကြရာ၊
အနက်ဓိပ္ပါယ်၊ သိလိုတယ်၊ မှတ်ဖွယ် ရှင်းပြပါ
(ဃ) “စိတ်သာလျှင်စော (ရှင်စော) ဘုရားဟော”ဟုလည်း ကြားဖူးပါသည်၊ အဓိပ္ပါယ်ကို ရှင်းပြပေးပါ အရှင်ဘုရား။
(ဃ) “စိတ်သာ ရှင်စောဘုရားဟော" စကားပုံက အရာရာတွင် စိတ်သာလျှင် ပဓာနဖြစ်တယ်-လို့ ရှင်တော်ဘုရား ဟောကြားတော်မူခဲ့ကြောင်း ဖော်ညွှန်းတဲ့ စကားစုဖြစ်ပါတယ်။
"စိတ်သာ ရှင်စောဘုရားဟော" ဆိုတဲ့အတိုင်း ကုသိုလ်အရာမှာဖြစ်စေ, အကုသိုလ်အရာမှာဖြစ်စေ စိတ် (စေတနာ)မပါလျှင် ကုသိုလ်လည်း မဖြစ်, အကုသိုလ်လည်း မဖြစ်ပါ၊ လှူလိုစိတ်(စေတနာ)ရှိခဲ့ပါလျှင် လှူစရာတွေ မရှားလှပါ၊ ရေတစ်ခွက်, ပန်းတစ်ပွင့်ကပင် လှူစရာဖြစ်ပါတယ်၊ အချို့ချမ်းသာသူတွေမှာ လှူစရာတွေ တောင်လိုပုံအောင် ပေါများသော်လည်း စေတနာမွဲခြောက်လို့ လှူချင်စိတ် မပေါက်တော့ ဒါနကုသိုလ် မဖြစ်ရှာကြဘူး။
မိမိရဲ့သွားလာလှုပ်ရှားမှုကြောင့် သတ္တဝါငယ်တွေ မြောက်များစွာ သေကျေပျက်စီးကြသော်လည်း မိမိမှာ သေစေလိုတဲ့စိတ် မရှိသောကြောင့် အကုသိုလ်မဖြစ်ဘူး။
ဘုရားရှင်လက်ထက်တော်က မျက်စိအလင်းမရတဲ့ စက္ခုပါလမထေရ်ဟာ စင်္ကြံသွားသည့်အခါ ပိုးကောင်ငယ်များကို နင်းမိ၍ ထိုပိုးကောင်များ သေကြရတယ်၊ ထိုအခြင်းအရာကို မြင်ကြတဲ့ ရဟန်းများက ဘုရားရှင်အား “ရှင်တော်မြတ်ဘုရား စက္ခုပါလမထေရ်ဟာ စင်္ကြံသွားကာ များစွာသော ပိုးကောင်တို့ကို သတ်ပါတယ် (သေစေပါတယ်) ဘုရား" လို့ လျှောက်ထားကြတယ်၊ ဘုရားရှင်က “စက္ခုပါလ ပိုးကောင်တွေသတ်တာကို သင်တို့မြင်သလော?” လို့ မေးတော်မူရာ ရဟန်းများက “မမြင်ပါဘုရား” လို့ လျှောက်ထားကြတယ်၊ ထိုအခါ ဘုရားရှင်က “ရဟန်းတို့ သင်တို့သည် စက္ခုပါလ သတ်သည်ကို မမြင်ကြသလို စက္ခုပါလကလည်း ထိုပိုးကောင်များကို မမြင်၊ ရဟန္တာပုဂ္ဂိုလ်တို့မှာ သေစေလိုတဲ့ စေတနာမရှိ” လို့ မိန့်တော်မူပါတယ်၊ စင်္ကြံသွားစဉ် ပိုးကောင်ငယ်များကို နင်းမိသဖြင့် သေကျေပျက်စီးပါသော်လည်း သေစေလိုတဲ့ စိတ်စေတနာမရှိသဖြင့် အပြစ်ကင်း၏- လို့ အရာရာတွင် စိတ်သာပဓာနဖြစ်ပုံကို ဟောကြားတော်မူခဲ့ပါတယ် ။
ဆရာတော် ဦးဇောတာလင်္ကာရ
ဓမ္မာနန္ဒ ဝိဟာရ
ဟာ့ဖ်မွန်းဗေးမြို့
No comments:
Post a Comment