ဒေါ်ကျင်မွှေး (Daly City) လျှောက်ထားသော မေးခွန်းမှာ---
ပရိတ် ၁၁-သုတ်မှ၊ ဘယ်သုတ်က၊ စ၍ ရွတ်မည်နည်း?
နတ်ပင့် နတ်ပို့၊ ရွတ်ဆိုဖို့၊ ဘယ်သို့ မိန့်မည်နည်း?
မေး။ ။(ခ) ပရိတ်ကြီး ၁၁-သုတ်မှာ မေတ္တသုတ် အဓိကထား ရွတ်ပါမည်၊ ဒါပေမဲ့ မည်သည့်သုတ်ကို အရင်ရွတ်ရ မည်နည်း? နတ်ပင့် နတ်ပို့ရွတ်ရအုံးမည်လော? ရှင်းပြတော်မူပါဘုရား။
(ခ) ပရိတ်ကြီး ၁၁-သုတ်အနက် ဘယ်သုတ်ကို အရင်ရွတ်မည်-လို့ သတ်မှတ်ချက်မရှိပါ။ ရှေးအစဉ်အလာအရ ဘုရားဝတ်တက်တဲ့ ညဝတ်ရွတ်စဉ်မှာတော့ ---
၁။ တနင်္ဂနွေနေ့မှာ သမန္တာက စ၍ မင်္ဂလသုတ်အကုန်၊
၂။ တနင်းလာနေ့မှာ ရတနသုတ်၊
၃။ အင်္ဂါနေ့မှာ မေတ္တသုတ်၊
၎။ ဗုဒ္ဓဟူးနေ့မှာ ခန္ဓသုတ်, မောရသုတ်, ဝဋ္ဋသုတ်၊
၅။ ကြာသပတေးနေ့မှာ ဓဇဂ္ဂသုတ်၊
၆။ သောကြ်ာနေ့မှာ အာဋာနာဋိယသုတ်၊
၇။ စနေနေ့မှာ အင်္ဂုလိမာလသုတ်, ဗောဇ္ဈင်္ဂသုတ်, ပုဗ္ဗဏှသုတ်တို့ကို ရွတ်ဆိုပါတယ်။
ဘုန်းကြီးတို့ ဓမ္မာနန္ဒ ဝိဟာရမှာ နံနက် ဘုရားဝတ်တက်တိုင်း ပရိတ်ကြီး ၁၁-သုတ်လုံးကို ရွတ်ဆိုပူဇော်ကြပါ တယ်။ ဒကာ, ဒကာမများအနေနဲ့ ၁၁-သုတ်လုံးကို မရွတ်နိုင်လျှင် မေတ္တသုတ်နှင့် ခန္ဓသုတ်ကို နေ့စဉ် ရွတ်သင့်ပါတယ်၊ ခန္ဓသုတ်ကလည်း မေတ္တာပို့တဲ့ သုတ်ပါဘဲ။
နတ်ပင့် နတ်ပို့ကတော့ ရှေးဆရာတော်များ စီမံခဲ့တဲ့ အစဉ်အလာကောင်း တစ်ခု ဖြစ်ပါတယ်၊ နတ်ပင့်-ဆိုတာ အမှန်တော့ ပရိတ်နာဖို့ နတ်များကို ဖိတ်တာဖြစ်၍ အလွန်တရာ လုပ်သင့်တဲ့ အကျင့်ကောင်းဖြစ်ပါတယ်။ နတ်ကိုပင့်ဖိတ်ပြီး နတ်ပို့ မလုပ်တာ ပြဿနာ မဟုတ်ပါ၊ ဧည့်သည်ကို ဖိတ်၍ ဧည့်ခံပြီးနောက် “ခင်ဗျားတို့ ပြန်ကြတော့”လို့ ပြောစရာ မလိုသလို ပါဘဲ။
ဆရာတော် ဦးဇောတာလင်္ကာရ
ဓမ္မာနန္ဒ ဝိဟာရ
ဟာ့ဖ်မွန်းဗေးမြို့
No comments:
Post a Comment