ရန်ကုန်မြို့, အေဝမ်းရွှေဆိုင်, ဒေါ်ခင်မြအိ လျှောက်ထားသော မေးခွန်းများမှာ—
အဟံ ဘန္တေ , မယံ ဘန္တေ၊ ဤနှစ်ထွေ၊ ဘာတွေ ကွာသလဲ?
မေး။ ။ အရှင်ဘုရား၊ (က) ဘုရားတပည့်တော်သည် လက်ဆယ်ဖြာ ဦးထိပ်မိုး၍ ရိုသေစွာ လျှောက်ထားအပ် ပါသည်ဘုရား၊ ဘုရားတပည့်တော်တို့သည် ဘုရားရှိခိုးသည့်အခါတွင် လူမှန်းသိတဲ့အခါကစပြီး “အဟံ ဘန္တေ”ကို အစချီ၍ ရှိခိုးပါသည်ဘုရား၊ ယခုတရားထိုင်သော ဒက္ခိဏာရုံကျောင်းတွင် ဘုရားရှိခိုးရာ၌ “မယံ ဘန္တေ”လို့ အစ ချီ၍ ရှိခိုးကြပါတယ်ဘုရား။
တပည့်တော် တရားခွေတစ်ခွေ နာယူစဉ်မှာ တရားဟောတဲ့ ဆရာတော်က “အဟံ ဘန္တေ”လို့သာ ဘုရား ဟောဖြစ်ပြီး “မယံ ဘန္တေ”က ထေရဝါဒနဲ့ ဆန့်ကျင်ဘက် ဖြစ်နေတယ်လို့ ပြောပါတယ်ဘုရား၊ တချို့ကတော့လဲ အတူတူဘဲလို့ ပြောပါတယ်ဘုရား။
“အဟံ ဘန္တေ နဲ့ မယံ ဘန္တေ” ကွာခြားမှု ရှိ မရှိ သိချင်ပါတယ်ဘုရား၊ ရှင်းပြလို့ ရမယ်ဆိုရင် ရှင်းပြတော် မူပါဘုရား။
ဖြေ။ ။ (က) ဘုရားရှိခိုးရာဝယ် သရဏဂုံ သီလတောင်းခံတဲ့အခါမှာ “အဟံ ဘန္တေ” အစချီလျက် တောင်းခံမှုက ရှေးထုံးစဉ်လာ ဆိုရိုးဖြစ်ပါတယ်၊ “မယံ ဘန္တေ” အစချီလျက် တောင်းခံမှုကတော့ အချို့နေရာများ၌ ဆိုလေ့ရှိတတ်ပါတယ်၊ “အဟံ ဘန္တေ”ကသာ ဘုရားဟောဖြစ်ပြီး “မယံ ဘန္တေ”က ထေရဝါဒနဲ့ ဆန့်ကျင်တယ်-လို့ ပြောတာကတော့ မှန်တဲ့အယူအဆ မဟုတ်ပါဘူး၊ “အဟံ ဘန္တေ”လို့သာ သရဏဂုမ်သီလတောင်းခံရမယ်-ဟု ဘုရားဟော ဘယ်ကျန်းဂန်မှာမှ မရှိပါဘူး၊ ရှေးဆရာတော်များက စီစဉ်ခဲ့ကြတာ ဖြစ်ပုံ ရပါတယ်၊ “အဟံ”ပါဠိစကားက “ငါသည် (အကျွန်ုပ်သည်)”ဟု မြန်မာပြန်ရတာမို့ ငါတစ်ယောက်တည်း- အနည်းဟော ဧကဝုစ် (Singular) ဖြစ်၍ “မယံ”ပါဠိ စကားက “ငါတို့သည် (အကျွန်ုပ်တို့သည်)”ဟု ငါတို့-အများဟော ဗဟုဝုစ် (Plural) ဖြစ်ပါတယ်၊ ပါဠိသဒ္ဒါနည်းအရ “အဟံ”ဟူသော ကတ္တားပုဒ်နှင့် လိုက်ဖက်တဲ့ “ယာစာမိ(တောင်းခံပါ၏)” သို့မဟုတ် “သမာဒိယာမိ (ကောင်းစွာ ခံယူပါ၏)”ဟူသော ကြိယာပုဒ်ဖြစ်လျှင်သော်လည်းကောင်း, “မယံ”ဟူသော ကတ္တားပုဒ်နှင့် လိုက်ဖက်တဲ့ “ယာစာမ (တောင်းခံပါကုန်၏)” သို့မဟုတ် “သမာဒိယာမ (ကောင်းစွာ ဆောက်တည်ပါကုန်၏)” ဟူသော -ကြိယာပုဒ်ဖြစ်လျှင်သော်လည်းကောင်း မှန်တာချည်း ဖြစ်ပါတယ်။
မြန်မာမူ, သီရိလင်္ကာမူ (သီဟုဠ်မူ), ထိုင်းမူ
သီလတောင်းပါဠိ
မြန်မာမူ၌
အဟံ ဘန္တေ တိသရဏေန သဟ ပဉ္စသီလံ ဓမ္မံ ယာစာမိ,
အနုဂ္ဂဟံ ကတွာ သီလံ ဒေထ မေ ဘန္တေ၊
မယံ ဘန္တေ တိသရဏေန သဟ ပဉ္စသီလံ ဓမ္မံ ယာစာမ,
အနုဂ္ဂဟံ ကတွာ သီလံ ဒေထ နော ဘန္တေ။
[အကျဉ်းချုပ် သီလယူ သီလဆောက်တည်ပါဠိ—
အဟံ ဘန္တေ တိသရဏေန သဟ ပဉ္စသီလံ သမာဒိယာမိ။
အဟံ ဘန္တေ တိသရဏေန သဟ အဋ္ဌင်္ဂသမန္နာဂတံ ဥပေါသထသီလံ သမာဒိယာမိ။
မယံ ဘန္တေ တိသရဏေန သဟ ပဉ္စသီလံ သမာဒိယာမ။
မယံ ဘန္တေ တိသရဏေန သဟ အဋ္ဌင်္ဂသမန္နာဂတံ ဥပေါသထသီလံ သမာဒိယာမ။]
သီရိလင်္ကာမူ၌ “အဟံ ဘန္တေ တိသရဏေန သဒ္ဓိံ ပဉ္စသီလံ ဓမ္မံ ယာစာမိ, အနုဂ္ဂဟံ ကတွာ သီလံ ဒေထ မေ ဘန္တေ”။
ထိုင်း (ယိုးဒယား)မူ၌ “မယံ ဘန္တေ တိသရဏေန သဟ ပဉ္စသီလာနိ ယာစာမ”။
“မယံ ဘန္တေ ဝိသုံ ဝိသုံ ရက္ခဏတ္ထာယ တိသရဏေန သဟ ပဉ္စသီလာနိ ယာစာမ”။
“အဟံ ဘန္တေနှင့် မယံ ဘန္တေ”သည် အနည်းနှင့် အများ, ဧကဝုစ်သုံးနှင့် ဗဟုဝုစ်သုံးသာ ကွာခြားပါတယ်။
အဟံ ဘန္တေ , မယံ ဘန္တေ၊ ဤနှစ်ထွေ၊ မှန်လေသည်ချည်းသာ။
အနည်း, အများ၊ ဝုစ်ထွေပြား၊ ခြားနား မှတ်ဖွယ်ပါ။
ဆရာတော် ဦးဇောတာလင်္ကာရ
ဓမ္မာနန္ဒ ဝိဟာရ
ဟာ့ဖ်မွန်းဗေးမြို့
No comments:
Post a Comment